Guau! Zeinen pozgarria den holako ekoizpen zainduak eta txukunak gozatu ahal izatea, kontzeptu, diseinu eta musikaren aldetik eta nola eskertzen dituen musikazaleak, benetako musikazaleak. Jakin badakielako gauzak ez direla zerutik erortzen, baizik eta atzean inplikazio eta lana daudelako argitalpen txukunak egiteko.

Lehenik eta behin, 75 gramoko!!! binilo txuria da, platoan jartzeaz gain baratxuriak mozteko ere balioko lukeena. CD formatuan ere badator tokadiskosa ez dutenentzat. Bigarrenik, lau taldek parte hartu dute KKLRD honetan, punk/hardcore konstelaziokoak guztiak: Madrileko Zinc, etxeko Estricalla eta Humilitate eta Mallorca/Argentinako Mostros taldeak. Hirugarrenik, Josebiskyren komiki bat dakar eta azkenik, barruko zein kanpoko diseinua guztiz landuak eta txukunak dira.

KKLRD split EP+CD+Comic! from hodei on Vimeo.

Musikari dagokionean, esan bezala talde bakoitzak abesti banarekin parte hartzen du. A aldean Zinc eta Estricallaren hardcore punka dugu entzungai La fiebre eta Despertad y enloquecer kantuekin. B aldean berriz, Humilitate eta Mostros ditugu, Libia Champions League kantuarekin (euskaraz dagoen bakarra eta ukitu metalikoak dituena, bortitzena izateaz gain) eta Storm weaver punk rock kantuarekin, hurrenez hurren.