Euskal Herriko musikaren historian aurrera egitea lortu duten bakarlari zein taldeek laguntza berezi bat izan dute atzean. Diskoetxeen babesaz ari gara. Salbuespenak egongo diren arren, urteetan musikariek sortu eta desagertu diren zigilu ezberdinen babesa izan dute. Egun ere badute, baina egoera ezberdina da. Musikaren industriak gainbehera nabaria bizi du mundu mailan. Eta mundua aipatuta Euskal Herria ere tartean sartu behar. Betidanik gertatu izan den bezala, krisiak eta sortzen diren proposamen berriek eragin nabarmena izaten dute gurean. Uka ezina da. Musika estiloekin gertatzen den bezala, munduan gehien jorratzen diren musika ezberdinek goizago edo beranduago taldeak sortzen dituzte. Diskoetxeekin gauza bera gertatzen da.