"30 urtez, Hala Bedi, uhinetan gara, kolpez kolpe" hitzekin hasten da Jhonny & Joseph bikote amerikanuak egindako Kortaturen Kolpez Kolpe kantuaren moldaketa. Izan ere, 30. urteurrenko kantua da hauxe, non Fermin Muguruzak ere kantatzen duen!
Baina dagoeneko aurreratzen ahal dizuegu, kantu hau, 30. urteurrena ospatzeko Hala Bedi Irratia prestatzen ari den bertsio-diskoaren zizka-mizka baino ez dela. Izan ere, beste hamabost kantu izango ditu, musikari arabarrek eta euskal herriko beste lekutakoek egindakoak.
1983 eta 2013 urteak bitartean Euskal Herrian sortu diren abestien bertsioak bilduko ditu eta estilistikoki irekia izango da oso: rock, hip hop, folk, ska, r&b, stoner... Diskoa udazken hasieran argitaratzea espero dute.

Guk tamalez, honaino irakurtzen ahal dugu, baina oso oso itxura ona duela komentatu gabe ezin gara geratu...