Bi urtez behin disko bat ateratzea ia ohitura bihurtu duzue. Zuen sorkuntza erritmo naturala al da hori?

Sorkuntza etengabea da. Iaz ere atera zitekeen beste disko oso bat. Kontua da, gauden merkatuan gaudela. Euskal Herrian gaude eta Euskal Herria geografikoki oso txikia da, eta horrek ere mugatzen du gure merkatua. Askotan, baita bizitzan ere, komeni izaten da egiten ari zarenetik urruntzea, gero indartsu itzultzeko. Aspaldi egin genuen hausnarketa zen etengabean ezin genuela hor egon. Apustu kontzientea da. Bi urtez behin diskoa atera, biran ibili, pixka batean desagertu, eta urte hori aprobetxatu konposatzeko eta diskoa grabatzeko. Berez, sorkuntzan ez dugu arazorik, baizik eta gure publikoa eta gu geu ez erretzeagatik uste dugu neurri egokiena dela. Eta bigarren argudio bat ere bada akaso. Alegia, taldeko kideok beste lan batzuk baditugula, eta hobeto egokitzen zaigula erritmo hau.