Robert Aiki Aubrey Lowek, Lichens edota Rob Lowe izenez plazaratu ditu dagoeneko hainbat grabaketa, baina hau da bere izen osoa erabiltzen duen lehen aldia. Horrekin bere lan zintzoena edo intimoena dela esan ote nahi duen ez dakit, baina bere nabarmenetako bat dela garbi daukat, eta niregan eragin biziena eta sakonena izan duela ere. Oraingo honetan, abesti beraren bertsio bana eskeintzen digu diskoaren alde bakoitzean. Istrumental hutsa lehena, bere ahots bitxiaz hornitua bigarrena. Era batera edo bestera, sintetizadoreen presentzia boteretsua da nagusi. Magma bolkaniko batetan murgildutako soinu baxu lodiak, errepikakorrak, hipnotikoak, zigor gozo baten moduan astintzen zaituzte.
Oinarrian 80. hamarkadako John Carpenter-en soinu banden edo Cabaret Voltaire eta DAFen intentsitatearen aztarnak ikusten ditut. Baina, nolabait, Robert-ek berezkoa duen epeltasuna gehitzen die. Batik bat, B aldean bere ahotsa azaldu eta ukitu kosmiko eta psikodelikoa agertzen denean. Une horretan Fonal diskoetxeko hainbat talde edo Current 93 eta Akauzazte modukoak gogorarazten ditu. Haiek bezala sasi-folk edo, hobe esanda, anti-folk esoteriko eta liluragarri horren mamuak ederki deituz eta etorri araziz.

http://typerecords.com/releases/timon-irnok-manta-2