Banda biek atera dute disko berria Baga-Bigako faktoriaren eskutik. Kautak lau urteko etenaldiari amaiera eman dion Agerre lana eta, Governorsek, Bilbon aurkeztu zuen Morphinapolis entzutetsua. Kafe antzokiko ostegunetako kontzertuek sona dute jada, eta data honetan, gehienetan, egungo musika talde euskaldunak entzuteko parada ematen digu Bilboko areto ezagunak.
Beraz, jenderik ez zen falta izan. Kauta atera zen oholtzara lehenengo. Mikel Moreno (ahotsa eta gitarra), Adrian Elustondo (baxua) eta Gorka Mendizabal (bateria) dira Kauta eta ondo defenditu zuten zuzenean disko berria. Zuzeneko eraginkorra, ejekuzio ezin hobea, baina batzuetan azeleratu samarrak nabaritu nituen, metalaren kontuak izango dira, hori baita Kautaren oinarria.
Hala ere, ez ziren falta izan ahots leunagoak Mikel Morenoren eztarritik. Disko berriko kantak jo zituzten nagusiki, hala nola, Izan genuen, Iraun genuen, Puzzlea, Begirada edota Oraindik ere.
Governors gogotsu igo zen eszenatokira. Bolumena iragarrita zegoen, baina beste ezusteko batzuk izan zituen kontzertuak, ez baikenekien sugar eta kez beteko zela eszenatokia gitarra jolea eta abeslaria bertako harmailetara igotzen zirela. Paradisu Bailara, diskoa zabaltzen duen abestiak, zabaldu zuen baita ere kontzertua. Etorriko ziren gero, Morphinapolis, Reset, Harresia, Baneki, Garai Berri hori edota Zuloan.
Jsang izan genuen zeremonia maisu eta ederki berotu zuen taldea ikustera etorritako publiko sutsua. Aurrealdean ondo dantzatu ziren Arrasatekoek egindako abestiak.