entzun.eus

Musika albisteak
eta agenda astero
zure postontzian!


| Sindikatu - RSS | Testu tamaina AAA

Kronika Zuzenak

bidali zure kritikak Bidali zure kritikak
Myriam Garzia 16/3/16

Bilboko Kafe Antzokia JP Lohian eta Klonen Klana + Mikel Uraken

Joseba eta Txap, diskoaren ekoizpenaren arduradunak, zuzenean ere eskuz esku. Arg: Oier Aranzabal Joseba eta Txap, diskoaren ekoizpenaren arduradunak, zuzenean ere eskuz esku. Arg: Oier Aranzabal

Klikatu argazkien gainean handiago ikusteko
Euskal musika-ezenaren baitan halako olatu talka bat sortu du Joseba Poncek lan berriarekin. Kritika ezin hobeak, publikoaren harrera ona eta, nola ez, lan bikainak eragindako poza eta satisfakzioa. Berak konposatu, musika tresna guztiak jo, ekoiztu (Karlos Osinaga 'Txap'-ekin batera) eta diseinua egin du. Disko borobila. Horregatik, ez da arraroa izan Bilboko Kafe Antzokian egindako kontzertuak jakin min handia sortu izana.


Antzokia lepo bete zen, Joseba eta taldearen harridurarako. Asteazkena bada ere, jende dezente bildu zarete, eskertzen da, esan zuen Hondarribikoak eta, eskerrak eman zituen behin baino gehiagotan, abestien bukaeran sortzen zen oihu eta garrasien gainetik.
Bederatzietan puntuan hasi zen kontzertua eta Mikel Uraken kantautoreak zabaldu zuen. Santutxuko abeslariak Neguaren ostean disko berria aurkeztu zuen, beti ere, modu berezi eta hunkigarrian.
Euskal folkaren eremuan kokatu dute Urakenen disko berria, baina esango nuke motz gelditzen den etiketa dela. Soilik gitarra akustikoaren laguntzarekin atera zen Uraken eta kontzertua hasteko zenbait mantra egin zituen gitarrarekin. Izan ere, gitarra akustikoa, gitarra elektrikoa bailitzan erabiltzen du santutxuarrak, sokak gogor astinduz (sarri aldatu beharko dituela pentsatzen dugu), rever-a eta distortsioa lagun. Jotzen dituen akordeak ere, nahiko rockzaleak dira eta jotzeko era ere halakoa da. Loan bezalako talde batean musika gogorra jo izanak zerikusirik izango du. Anari eta Mikel Laboa miresten dituela esan du behin baino gehiagotan Urakenek eta Ez dok Amairuren bidea jorratzen badu ere, (oihuak eta irrintziak barne), denbora ez da alferrik pasatu. Mikel Urakenen musika erabat garaikidea dela esango nuke, bere bi zutabeak, euskal sustraia eta rocka, nahasten dituen ezohiko kantautorea. Indar handiko zuzenekoa eskaini zuen bilbotarrak.

Berehala heldu zen denok espero genuen unea. Joseba eta klonen klana oihu eta garrasi artean atera ziren eszenatokira. Disko berria dagokion segidan jo zuten, Alperrik da apaintzea abestitik hasi eta Sekretua abestiarekin bukatu. Niri ere labur egin zait, barre egin zuen abeslariak bukatutakoan. 8 abesti, 8 bala musikari handi hauen eskutik: Libe (teklak), Txap (baxua), Galder (bateria), Gontzal (gitarra) eta Joseba bera (gitarra eta ahotsa). Libek eta Txapek lagundu zuten ahotsetan abeslaria.
Guzti hau ez da erreza izan, azaldu zuen Poncek. Berak sortu, konposatu eta ondutako abestiak beste musikari batzuen esku uztea eta diskoa bere horretan erreproduzitzea ia ezinezkoa baita. Baina klonek ondo bete zuten lana. Eskertzekoa da musikariok egin duten esfortzua. Merezi zuen.
Disko berriaren abesti guztiak jotzen amaitutakoan, bisak eskatu zituen publikoak. Zer joko ote zuten zen galdera: Entzun duzuenez diskoko abesti guztiak egin ditugu, esan zuen Josebak. Oparitxo bat egin zigun abeslariak, argitaratzeko denborarik ez eta diskoan sartu ez ziren abesti berriak jo zituzten. Luxu bat.
Denboran atzera egin nuen nik nahita nahiez, kontzertuaren tarte batzuetan. Azken finean, Dut taldearen itzala luzea da, batez ere garai horietan gazteagoak ginenontzat Sua ehortzi genuenean, Sekretua abestian abesten duen bezala. Joseba eta Galder Dut-eko kideak elkarrekin ikusteak eta entzuteak eta beraien ondoan garai horretako beste kide bat egoteak (Lisabko Txap), Dut taldeak Kafe Antzoki zabaldu berriko kontzertuetan sortzen zuen zirrara gogorarazi zidan.

Baina esan bezala, denbora ez da alferrik pasatu, eta ikusgarria da musikari hauek izan duten garapena bakoitzak bere eremu eta proiektuetan, pozteko gauza dudarik gabe. Joseba Ponce bera eszenatokian dagokion lekuan ikustea berri ona da euskal musikarentzat.

Oharra: gure esker ona adierazi nahi diogu Oier Aranzabali kontzertuko argazkiak bidaltzeagatik.
bidali zure kritikak Bidali zure kritikak
Bidali zure iruzkina


kaptxa

bai, ezagutzen dut datuen erabilpen politika eta onartu.

bai, entzunen buletina astero jaso nahi dut.