Julen Azpitarte izeneko tipo ipurterre eta irribarretsu bati otu zitzaion Pop Pilulak fanzinea martxan jartzea joan den urtearen hondarrean. Ez zen ordea, iritsi berria fanzineen mundura. Aurretik, Mofo! gisako argitalpenetan aritu baitzen, paperezko autoekoizpenen zale amorratua izateaz gain. Bada, Durangoko Azokan aurkeztu zuen lehen zenbakia eta harrera ezin hobea izan zuen (Entzun!en estandean saltzeko ekarri zizkigun ale guztiak agortu ziren).
Orain, itzuliko zenaren mehatxuak egi bihurtu eta tipo ipurterre eta irribarretsu hau bueltan da Pop Pilulak-en bigarren zenbakiarekin. Potoloagoa eta mamitsuagoa da zenbaki berria (kolaboratzaile gehiago eta orri gehiago ditu), baina lehendabizikoaren xarma bera gordetzen du: zuri beltzezko diseinu argia, irudien aukeraketa zaindua eta pop kulturari lotutako testuak: zinea, musika, artea, literatura... Hala, Antton Iturbek Free Cinemari buruz idatzi du, Koldo Almandozek Basque Paranormal Activity-ari buruz (bitxia benetan) edota Goizalde Landabasok Historiako emakume ezkutuei buruz.
Musikaren atalean, William S. Fischer musikari estatubatuarraren pasarte xelebre batean muturra sartu du Azpitartek berak, euskal musikagintzak eman duen disko sorta aluzinogenoenaren misterioaren korapiloa askatzeko. Bien bitartean, Jotakie izan du mintzagai Fermin Etxegoienek edota Sonic Youth taldea Mikel Lizarraldek.
Ez ditugu eduki guztiak zerrendatuko, baina irakurraldi ederrak igaroko dituzue bestondo makarra baten osteko azal politikoki ez zuzena irekitzen baduzue. Gainera, hori gutxi balitz, gehigarri bat ere badakar, non Michico Kambak abangoardia artistikoak izan dituen hizpide.