Jon Montanchezek (ahotsa) eta Isusi anaiek (Jon, gitarra; Alex, bateria eta perkusioa; eta Diego, baxua) osatzen dute Itsaskiak taldea. Laukoteak Juan Martinez Jorqueraren laguntza izan du lehen lana atontzeko: idei, efektu, konposaketa eta abar luze batez arduratu da.

Itsaskiak taldeak bost kantu jaso ditu bere aurkezpen-txartelan. Pop eta rockaren olatuetan kulunkatzen da euren soinua, eta olatua apurtzen denean, darizkion aparrek folk eta country amerikarraren zaporea daukate. Jon Montanchezen ahotsa, gainera, erakargarria iruditu zaigu.

Goiz da taldea zer emateko gai izango den jakiteko, baina debut argitsua eta atsegina burutu du Bizkaiko laukoteak.


1. Dindandua (denda ondoan do)
2. Kosta ahala koska
3. Konzentrazioa
4. Kontraesanean jausi
5. Apokalipsiaren bezperetan