DVDaren azken irudiak ikusi eta gero, sentsazio aldi berean tristea eta gozoa geratuko zaio bati baino gehiagori gogoan itsatsita. Eta ez DVDa gaizki dagoelako, ezta gutxiago ere, oso lan txukuna argitaratu baitute Gorreko lagunek, baizik eta berriz etorriko ez diren garaiak gogora ekarri dizkigulako kasik abisatu gabe, nahiz eta aurretik ere jakin bagenekien Kojon Prieto y Los Huajolotes taldeari buruzko bideolan bat genuela esku artean. Eta sentsazio hori areagotuko zitzaigun, segur, Gavilan hain juxtu duela urte bat joan zelako, eta omenaldi moduan ere uler daitekeelako ikus-entzunezko lan hau. DVD honek Huajoloteen historia zehatza baino, taldearen izaera islatzen du gehien bat, gauzak ikusteko eta izateko modu bat. Izan ere, Gavilan buru zuen taldea punkatik gertuago zegoen mariachi batetik baino. Napar Mex izenarekin bataiatu zuten 90eko hamarkadaren hasieran sekulako arrakasta eta entzutea izan zuen euren