Txalotzeko moduko ekimena da Sputnik 11, Tolosako Otsabi auzo elkarteak eta Bonbereneak kaleratu duten bilduma. Tolosaldeako lau talde gaztek grabazio estudioan lehen aldiz aritzeko, beren kantu batzuk grabatzeko eta kantu horiek kaleratzeko parada izan dutelako. Gainera, Sputnik 11 ez da disko bat bakarrik, proiektu bat baizik. Erreferentzia izatea lortu nahi dute bultzatzaileek, beste talde batzuen kantuak kaleratzeko aurrerantzean. Otsabirekin eta Bonberenearekin elkarlanean, aipatu lau taldeek lagunartean egindako diskoa dela ere azpimarragarria da. Auzolana ezinbestekoa baita hasi berri diren taldeentzat, eta gainerakoentzat ere bai, oro har, garai zail hauetan. Talde bakoitzaren bi kantu entzuten ahal dira bilduman. Zortzi kantu, guztira. Switch taldeak metal doinuak jotzen ditu; Indekitxenen kantuetan, berriz, gitarrez ederki apaindutako melodia politak eta denbora erdiko erritmoak entzuten ahal dira; Glaukoma Sound Systemek, aldiz, reggae eta Karibe aldeko aireak jorratzen ditu; eta Dolce Tanganak, azkenik, ska doinuak bizitasun handiz jotzen ditu. Grabazioa txukuna da, eta diskoa berehala entzuten da. Lau proposamen desberdin, eta talde bakoitzaren bi kantu bakarrik izanik, arina egiten da entzunaldia.