Donostiako Udalak, Donostia Kulturaren bitartez, Ruperri bere ibilbidearengatik eta euskal kulturari eta musikari egindako ekarpenarengatik emango dio Adarra saria ekainaren 21ean, arratsaldeko 19.00etan, Donostiako Victoria Eugenia Antzokian.
Sari honekin 1980an argitaratutako Hautsi da Anphora disko historiko hartatik, gaur egun arte bere kantuen kalitateaz aparte, bere ibilbidearen seriotasuna, bere jarrera artistikoaren modernotasun berezkoa eta konpositore gisa egin duen lanaren sakontasuna saritzen da, besteak beste.


Ekitaldi berean, Ruper Ordorikak kontzertu berezia (eta diskoetxetik diotenez, "ahaztezina" izan daitekeena) eskainiko du. Ruperrek, lehen diskotik 2014an ateratako Lurrean etzanda diskora iritsi arte, bere ibilbide luzea osatu duten abestien aukeraketa zaindua egingo du.

Ruperrekin batera, musikari hauek arituko dira; Leo Abrahams (gitarra eta prozesadoreak), Arkaitz Miner (gitarra, mandolina eta biolina), Hasier Oleaga (bateria) eta Fernando Lutxo Neira (baxua).