Igor Alustiza Garmendia beasaindarra dago Nikkin izenaren atzean. Bere bakarkako proiektua da. Rock industriala du oinarri eta zuzenean 2014ko Jazpana! jaialdian debutatu zuen. Orain, lehen diskoa aurkezteko tenorea heldu zaio.

Goazen, hala ere, Igor Alustizaren ibilbidea errepasatzera, Nikkin proiektura heldu arte.
Beasaingo musikaria bederatzi urterekin hasi zen gitarra jotzen eta nerabezarotik izan da eskualdeko musika eszenaren parte. Hainbat taldetan (Spurium, The Gu, Zero...) aritu da instrumentu ezberdinak jotzen. Beti ere, grunge, stoner, rock alternatibo edo rock industrialaren influentziapean. Zero taldea desegin zenean, entsegu zein eszenatokiez nekatuta, atseden baten beharra sentitu eta bere kantuak bakarka garatzen hasi zen, baina ezagutzera emateko asmorik gabe.
Zoritxarrez, Igor gaixotu zen. Giltzurruneko gaitz larri batek jota, musikan topatu zuen babesa eta motibazioa. Nikkin sortu eta buruan zituen doinu eta kantuei forma ematen hasi zen eriondo izan zen denbora luzean. Etxean estudio txiki bat atondu eta lehen kantuak grabatzen hasi zen inoren laguntzarik gabe. Hasieratik bukaeraraino, Igorrek sortu eta jotako kantu hauek lagunek entzun zituztenean aho bete hortz utzi zituen: