Aspaldian hasi zen Korrontzi gure musika tradizionala Euskal Herrian zein munduan barrena erakusten. Ez da berria ezta ere, Korrontziren eta dantzaren arteko harremana. Hain zuzen ere, 2008an abiatu zen. Baina bien arteko harreman estu honek bestelako munta hartu zuen 2009an Oinkari dantza taldearekin elkarlana abiatu zutenean. Orduz geroztik, hainbat egitasmo gauzatu dituzte elkarrekin: zuzeneko ikuskizunak, bi ikus-entzunezkoen grabaketa eta abar luze bat.

Oraingoan, beste proiektu bati ekin diote: Euskal Herri osoko dantza taldeei gonbitea luzatu diete haiekin dantzatzeko. Proiektuaren ardatza zera da: dantza taldeei eskaintzea euren herrietan Korrontzi taldearekin elkarlanean zuzenekoa ematea. Horretarako Oinkari dantza taldeak irakasle lanak beteko ditu edo, egokiago esateko, master class-ak emango ditu Korrontzi taldearekin batera prestatu, hezi eta irakasteko dantza horien urratsen zoko zein zirrikitu guztiak.