Ttakun eta erren. Txalapartaren bi kolperen izenak dira (2 kolpe eta kolpe bakarra). Azkenaldian, inoiz baino urrunago entzuten dira kolpeok. Txalapartak susperraldia eta zabaltzea bizi du azken urteetan. Booma? Ongi egindako lanaren ondorio? Bietako edozein delarik ere, argi dago txalaparta musika tresna heldua dela eta musikariek bere aukera erritmiko eta melodikoak gero eta gehiago baliatzen dituztela.

Reggae bezala ezagutzen den jamaikar musika Karibeko irla txiki batean jaio arren, isolatua geratzetik urrun, etengabeko harremana eta lotura izan du inguruan egiten ziren musikekin. Gertuko irletako musikarekin hasieran eta aurrerapen teknologikoek lagunduta (irrati aparailuen zabalkundeari esker bereziki) urrunagoko lurraldeekin beranduago, Estatu Batuetako afro-amerikarrek egindako musikarekin izandako lotura azpimarratzekoa litzateke. Harreman honen lehen urteetan, eragina norabide bakarrekoa izango da (AEB-etatik Jamaikara) baina denborarekin norabidea bi zentzuetan emango da eta gaur egun, Ipar Amerikan egiten den musika beltza (rap, R&B...) eta mundu mailan egiten den musika elektronikoa (jungle, drum&bass, techno, house...) ulertzea ezinezkoa litzateke hauengan jamaikar musikak izan duen eragina kontutan hartu gabe. Liburu asko idatzi beharko lirateke guztia azaltzeko (eta gurea baino ezagutza handiagoa beharko litzateke), baina gutxienez, jamaikar musikak jaso eta suposatu duen eraginaren puntu batzuk azaldu nahiko genituzke, osotasuna ahaztu gabe, garrantzitsuak diren pintzelada batzuk emanez.

Asko dira zinera jauzia egiten duten rock izarrak. Goia jo dute musikari esker, baina, antza denez, horrek ez die erabat asebetetzen. Gizakion izaerari estuki lotutako fenomenoa da: gauza bat lortutakoan gehiago nahi izatea, alegia. Bada, batzuek beren egoa puzten segitzeko eta beste batzuek kontu korronteari zeroak gehitzen segitzeko (edo biak batera) zinean probatzen dute. Noski, fotogrametan agertzeko bestelako arrazoirik duenik ere badago.