2006-07-04
Boskote portugaldar honek zur eta lur utzi zuen rock and roll zale bat baino gehiago bere lehendabiziko disko luzearekin. I bet you love us Too (Hey Pachuco! 2003) estreinakoan, garage rock doinu biziekin, soul izpiekin eta melodia liluragarriekin josita zeuden dozena bat kantu sendo bildu zituzten. Aurten, The Marriage of Heaven and Hell (Hey Pachuco CDa eta Beatnikmoon Crafts LPa) merkaturatu dute. Lan helduagoa erditu dute, sakonagoa. Eraginak ez dira hain nabariak, hortaz, emaitza pertsonalagoa da. Barreirokoek Europako talde onenen mailan jokatu ohi dute. Norbaiti baieztapen hori gehiegizkoa dela iruditzen bazaio, hobe du haien zuzenekoetara gerturatzea. Nick Nicotinerekin mintzatu gara (abeslaria, gitarra, harmonika, pianoa eta diskoen grabazioen arduraduna).