Oraingo taldean Hasier Oleaga (bateria), Amaiur Cajaraville (kontrabaxua) eta Bixente Martinez (gitarra) daude. Talde gaztea eta beteranoa da, era berean, esperientzia eta sen handiko musikariak.
Igelaren Banda berritu hau, aurrekoaren ildo beretik dabil; hau da, euskal kantu edo dantza zaharrak, euskal musika tradizionala oinarri hartuta, bertsio berriak sortzen dituzte. Modu instrumentalean, konponketa eta harmonizazio berriak egiten dituzte, betiere inprobisazioari leku berezia emanez.
Preguntatxo bat bigarren disko hau, azken urteotan zuzenean erabili duten errepertoriorik gogoangarrienaz osaturik dago.
Igelaren Bandaren emanaldiak ez dira, dena dela, musika hutsa. Elkar diskoetxetik jakinarazi digutenez, "doinu bakoitzak du bere historia, bere jatorria, bere ibilbidea, nola gure kulturaren oroimenean hala gugan ere. Atseginak bezain entretenigarriak suertatzen dira, beraz, taldearen kontzertuak, samurrak, hurbilekoak eta aberatsak".