Oreka TX

Klikatu argazkien gainean handiago ikusteko

Ondare balioa duten ontzi tradizionalen nazioarteko topaketa hartuko du Pasaiak maiatzaren 26tik 29ra bitarte. Itsasoa eta nabigazio-kultura ardatz duen Itsas Festibal horren karietara, hainbat musika emanaldi programatu dituzte Pasaiako lau barrutietan. 

Euskal Herriko nahiz kanpoko 10 artista eta talde baino gehiago ariko dira zuzenean Pasai Donibanen, Pasai San Pedron, Pasai Antxon eta Trintxerpen barreiatutako eszenatokietan, eta guzti-guztiak doakoak izango dira. 

Ostegunean, maiatzak 26, Oreka TX & Thierry Biscary ariko dira, 20:00etatik aurrera, San Pedron. Jaialdiko lehenengo kontzertua izango da eurena. Jarraian, Pao Barreto kolonbiarrak hartuko die lekukoa cumbia, soul, funk, swing eta reggae estiloko kantekin. 

Ostiralean, maiatzak 27, Deñe eta Mugan ariko dira Pasai Donibanen, 18:30ean eta 20:30ean hurrenez hurren. 22:00etan Fetén Fetén bikoaren txanda izango da, ‘Melodías de Ultramar’ aurkeztuko dute. Egun berean, baina Trintxerpeko eszenatokian, Kyxo, Lamiak eta Liher ariko dira 19:00etatik aurrera. Liher laukoak, gainera, Miren Narbaiza eta Noa Egiguren gonbidatuko ditu emanaldira. 

Azkenik, larunbatean, maiatzak 28, Rumpling Lips, Arima Soul eta Fundación Tony Manero taldeak arduratuko dira musika egitarauari amaiera emateaz. Kataluniako talde mitikoaz zuzenean gozatzeko azken aukeretako bat izan liteke, El Último Baile agur-biran murgilduta baitabiltza.