Bederatzi mila bideo baino gehiago jaso ditu Zetak taldeak bere kanta berriari irudiak jartzeko. Batzuk aukeratu eta horiekin osatu dute behin betikoa. Lagunarteko edota familiarteko une alaiak irudikatzen dituzten aleak dira denak, izan ere, Itxaropenaren Ereserkia izan nahi du kanta honek.

“Biluztu egin gara, gure oinarrira itzuli gara. Senide zein lagunen arteko loturek osatzen dute gure azala, eta gainontzeko trapuak, orain bai, hutsalak zaizkigu. (…) Hertsiki helduko diogu garai honek kendu digunari: besarkadak luzatu, bidean utzitako musuak eman, begiratu, maitatu, gozatu, ukitu, sentitu. (…) Elkarrekin ari gara igerian, norabide berean, baina bakoitza bere ibaian. Bat egingo dute gure urek, eta ozeano zabal hori zeinen ederra izango den."

Halaxe jaso dute Nerea Reparazen hitzek Zeinen Ederra Izango den abestia aurkezteko balio izan duen testuan, eta Pello Reparaz berak aitortu du kanta hau zuzenean joko duten egunarekin amesten duela.