Covid19-aren garaiotan musika talde asko ari dira, bideodeiak baliatuta, collage moduko formula erabiltzen abesti mitikoak berpiztu eta bertsio berri bat eskaintzeko.

Horixe bera egin du Gozategi taldeak Emoistasu musutxue arrakastatsuarekin, eta sare sozialetan argitaratu dute emaitza: Musu Birtualak 1. Itxialdi egun hauetan lanean eta borrokan jo eta ke ari diren guztiei eskaini diete abestia, musu birtualak bidaliz.

Bide batez, bideoklipa are gehiago aberastu nahian, zaleei luzatu diete deia eurek ere musu birtualak partekatu ditzaten. Jaso dituzten musuak, marrazki, argazki eta bideo zatiekin behin betiko emaitza osatu eta partekatu dute: Musu Birtualak 2.