Bueltan da Caostica Nazioarteko Jaialdia, aurten hemezortzigarrenez. Festibalak hiru atal dakartza, tartean bideoklip edo musika bideoei zuzenduriko bat. Musika pieza original bat sustatzeko lana izan behar du, edozein delarik ere estiloa: popa, rocka, hip-hopa, technoa, punka, soula, r&b-a, klasikoa, reaggetoia, trap-metala… Piezak, gehienez, 10 minutuko iraupena izan behar du, eta edozein hizkuntza balia dezake.

Lanak Movibeta on-line plataformaren, Festhome edo FilmFreeway webguneen bitartez soilik bidal daitezke, beranduenez 2020ko apirilaren 15ean.

Bideoklip ataleko lan irabazleak 1.000 euroko ordainsaria jasoko du. Baina, gainera, beste bi kategoriatan ere lehiatu daiteke parte-hartzaile bakoitza. Izan ere, Euskaraz Sortutako Lan Onenaren Saria ere banatuko du epaimahaiak, baita Bizarro Saria delakoa ere: Jaialdiarekin bat datorren lanik lotsabako, berritzaile, bitxi, adeigabeko, martetar, baldar, arraro, arriskutsu, ausart eta adoretsuena.

Egile bakoitzak nahi beste lan aurkez ditzake. Epaimahaiak festibala hasi baino hiru aste lehenago jakinaraziko die egileei zeintzuk diren aukeraketa ofiziala osatuko duten lanak, hautagaiak alegia. 

Caostica Nazioarteko Bideoklip eta Film Laburren XVIII. Jaialdia ekainaren 1etik 8era egingo dute Bilborocken, eta orduantxe jakinaraziko ditu epaimahaiak atal bakoitzeko irabazleen izenak, eta orduantxe izango da, baita ere, sari-banaketa eta lanen proiekzioa.