Klikatu argazkien gainean handiago ikusteko

Berezko izaera duen jaialdia da Bay of Biscay Festival; kresala DNAn eta motorrean daramana, ekitaldi kulturala eta gastronomikoa aldi berean. Izan ere, 2020ko uztailaren 24tik 26ra bitarte, makina bat kontzertu ez ezik, esperientzia kulinario bizia ere eskainiko du festibalak.Adin guztietako publikoarengan pentsatuta antolatzen dute gainera. Horregatik, musika eta sukaldari finenek prestatutako janaria txikienentzako tailerrekin eta familia osoari zuzendutako ekintzekin osatzen dute.

Motorrak berotzen hasteko, aurtengo edizioko kartelburu izango den The Hellacopters taldearen parte-hartzea iragarri du antolakuntzak, espainiar estatu osoan emango duten zuzeneko bakarra izango baita. Suediarrek euren betiko soinu indartsua ekarriko dute, inoiz baino elektrikoago eta rockeroago.

Eta haiekin batera beste bi banda herrikide: Royal Republic eta Witchcraft. Lehenak rock alternatiboaren erritmoetan mugitzen dira; bigarrenek doom metal potentea dute zigilu.

Murriztutako preziodun lehenengo 350 sarrerak agortu ondoren, 50 euroko sarreren bigarren promozio bat abiatu du Bay of Biscay Festivalak, hiru egunetarako sarbidea bermatu nahi dutenentzat.