Martxoaren 25ean Don Mariani australiarraren DM3 taldeak kilate eta kalitate handiko power-pop doinuak ekarriko ditu. Urte eta kilometro askoko eskarmentua, melodia zoragarriak kantu kementsu eta gihartsuetan. Australiarra, besteak beste, The Stems eta The Someloves taldeetan aritu da.

Apirilaren 2an, larunbatarekin, Big Sandy eta bere Fly-Rite Boys izango ditugu. Blues, rock and roll, country eta swinga baliatuz, emanaldi bizia eta dantzagarria eskainiko dute.
Sei soken munstroa den Greg Townson, Hi Risers-en gitarra jotzailea, arituko da baita ere. Ongi aski daki gorputza dantzan jartzen rock and roll klasikoenaren doinuekin, ia mende laurdena baitarama horretan.

Zikloari akabera emateko, maiatzaren 13an, ostiralarekin, Andre Williams. Mr Rhythm, bueltan izanen dugu Euskal Herrian. Chicagoko Goldstars taldearekin dator eta azken diskoetan argitaratutakoei erreparatuko dio. Rock and rollaren eztanda gazte gaztetan ezagutu zuen bizirik dugun mito bat.