Iparragirre, Bihotzeko Jose Mari du izena Urretxuko Bardoaren jaiotzaren 200. urterurrenaren harira taularatuko duten obrak. Iparragirreren kantu mitikoak ez ezik, pop, ska, blues, tango nahiz runba doinuak ere badakartza Angel Unzuren gitarran, eta Joli Pascualena, Ainara Ortega eta Ane Gabarain aktore-kantarien ahotsean.

Loraldia Kultur Elkarteak, Tanttaka antzerki konpainiak eta Demode Quartet musika taldeak sortu dute ikuskizuna, elkarlanean, eta Iparragirreren bizitzan garrantzia izan zuten emakumeen begietatik erakutsiko digu kontzertu antzeztuak bardoaren soslaia, sortzaileek eurek azaldu digutenez.

Aizpea Goenaga, Arantxa Iturbe eta Iñigo Legorburu idazleek hainbat eskutitz idatzi dituzte Iparragirreren amaren, emaztearen, alabaren, Manuelaren eta beste hainbat emakumeren ahotsa bere eginda, eta hiru aktore-kantarion ahotan jarri dituzte hitzok, Fernando Bernuesek zuzendutako ikuskizunean.

Koronabirusak eragindako egoeraren aurrean, oraindik zehaztu gabeko datetara atzeratu dira Urretxun eta Bilbon, martxoaren 10ean eta 11n, hurrenez hurren, izango ziren aurrestreinaldia eta estreinaldia. Gerora, Euskal Herrian barrena aurkeztuko dute.