Klikatu argazkien gainean handiago ikusteko

Mende laurdena darama Mikel Urdangarinek musika egiten. Eta hain justu mendeurren horren karietara hartu du forma ‘100/25  BOS – Mikel Urdangarin’ proiektuak, Bilboko Orkestra Sinfonikoak 100 urte bete dituen une berean. 

Urdangarinen errepertorioko eta orkestrarako moldaketako kanturik esanguratsuenetako batzuen aukeraketatik abiatzen da ekimena, eta disko forma hartuko du. Guztira 15 abestik osatuko dute lana: horietatik hamahiru Bingen Mendizabalek orkestrarako moldatutakoak; beste biak Koldo Uriartek eta Fernando Velázquezek moldatu dituzte, eta den-denak 

Bilbao Orkestra Sinfonikoak interpretatuko ditu, Iker Sánchez de Silva orkestra-zuzendari eta konpositorearen gidaritzapean. 

Diskoa uda amaieran grabatuko dute, baina kontzertuak ere iragarri dituzte. Lehena abuztuaren 20an izango da, Bilboko Aste Nagusiaren testuinguruan. Bigarrena, berriz, irailaren 4an Getxoko Muxikebarri aretoan. 

‘100/25  BOS – Mikel Urdangarin’ ekimenaren baitan sortuko diren zuzenekoak Urdangarin aurten egiten dabilen ‘25Tour’ birarekin uztartuko ditu. Bira honek, Euskal Herriko plazetara ez ezik, munduko hainbat lekutara eramango du artistaren errepertorioa, tartean New York, San Francisco eta Bakersfield-era.