LOU. Dantzan jo ta ke, oinak lehertu nahian.

Lou Olangua 80ko hamarkadako euskal rockak izan zuen aurrenetariko emakume ahotsa izan zen. Humedecidos, Ok. Korral edota Las lagartas taldeetako abeslaria izan zen baina, ahots bat ez ezik, indarra ere bazen bere horretan. Horixe erakusten zuen oholtza gainean, bere jarrera eta itxurarekin. Probokatzaile hutsa zen.

Andrea Lopetegi, Izotz Barrio eta Usua Garin zuzendariek Lou Olangua omendu zuten ‘LOU. Dantzan jo ta ke, oinak lehertu nahian’ dokumentalarekin (2019). Eta, bide batez, edo Olanguaren bitartez, 80ko hamarkadan emakumeek izan zuten lekuaz, euskaraz eta, estetikaz gain, jarrerak izan zuen garrantziaz ere aritzen dira ikus-entzunezkoan. Sozialki eta kulturalki apurtzailea izan zen erreferente batez.

Lanak Publikoaren Saria irabazi zuen 2019ko Dock Of The Bay musika dokumentalen jaialdian, eta han eta hemen proiektatzen ibili dira urte osoan zehar. Orain, zuzendariek iragarri dutenez, 58 minutuko pieza osorik eta doan ikus daiteke Sarean.

https://www.youtube.com/watch?v=AdVazB4dkfc&feature=youtu.be