‘Ikus gaitzazuen desagertuko gara, entzun gaitzazuen isilduko gara’ lemapean, euskal kulturgintzako sortzaile, antolatzaile, programatzaile eta bestek greba digitalerako deia luzatu dute apirilak 21 eta 22 egunetarako; Interneten inongo edukirik ez partekatzeko proposamena zabaldu dute.

Kulturgintza.eus webgunean azaldu dute ekimen honen izaera eta, batez ere, helburuak: 

1.- Gogoeta eta eztabaida soziala eragitea: 
Zein balio ematen diogu gure kulturgintzari? Zein garrantzia du gure egunerokoan? Zenbat kultura kontsumitzen dugu? Kulturgintzaren prekarietateaz (batez ere sortzaileenaz) eta lan baldintza kaxkarrez ohartzen gara?

2.-Premiazko neurriak hartu behar direla exigitzea:
Euskal Herriko erakunde publikoek COVID19aren krisialdiak eragin dituen kalteei erantzuteko premiazko neurrien beharraz ohar daitezela eta jar ditzatela martxan.

3.- Euskal kulturgintzaren ekosistema osatzen dugun guztiontzat elkargunea izango den mahai/bilera/topaketa antolatzeko lanean hastea:
Euskal kulturgintzaren gabezia eta premia larriei aurre egiteko zer egin proposatu, eztabaidatu, adostu eta gauzatzeko. 

“Itxialdi garaiotan, kultur ekimenak etengabe zabaltzen ari dira sare telematikoetan eta hedabideetan. Zuzeneko emanaldiak, grabatuak, irakurketa aholkuak, dantza ikastaroak…, gehien-gehienak debalde. Sortzaileok egoeraren jakitun ari gara duguna herrikideekin eskuzabaltasunez partekatzen eta, oraingoan, trukean kulturaren balio soziala hausnartzeko eskatu gura dizuegu”.