Gasteizko Oihaneder Euskararen Etxeak Batera diru-laguntzaren bigarren deialdia abiatu du. Hiriko gazte sortzaileen kultur ekimenak babestea da antolatzaileen helburua, tartean, noski, musika proposamenak.

Crowdfunding egitasmo bat martxan jartzen laguntzeaz gain, 2.000€ko ekarpena egingo diete deialdian aukeratutako 3 proiektuei.  Proposamenak aurkezteko epea 2020ko urtarrilaren 7ra bitarte egongo da zabalik. Batera-k Laboral Kutxa eta Vital fundazioaren babesa izango du eta, hauen ekarpenari esker, edizio honetan egitasmoak garatzeko aurrekontua bikoiztu egin da iazkoarekin alderatuz: guztira, 6.000€.

16-35 urte bitarteko gasteiztarrei zuzendutako ekimena da Batera, eta gazteen proiektu kulturalei bultzada ematea du xede, askotariko lengoaia erabilita: internet bidez eta parte-hartzea sustatuz. Edozein ideiak balio du euskaraz garatzekoa bada, eta kulturarekin zerikusia badu: musika sorkuntza noski, eta baita bestelakoak ere (liburu bat argitaratu, ekitaldi bat antolatu, APP bat sortu, bideo-jolas bat garatu, antzezlan bat sustatu… etab.).

Jasotako proposamenen artean, epaimahaiak 3 proiektu aukeratuko ditu, eta gazte horiei Crowdfunding egitasmo bat eta bere komunikazioa  antolatzen lagunduko diete. Behin Crowdfunding egitasmoa martxan izanik, Oihanederrek 2.000€ko ekarpena egingo die 3 proposamen irabazleei. Beraz, guztira 6.000€.

Itsulapikoa.eus plataforman daude ikusgai deialdiaren oinarri orokorrak.