Kolorez Jantzitako Egunak izeneko abestia hiru urteko alabarekin batera sortu omen du Josu Bergara musikariak; etxean eta gitarraren laguntzaz. Ondoren, Akorde Txikiak bandako kideengana (Nerea Alberdi, Mikel Nuñez, Irati Bilbao, Txema Arana, Dani Gonzalez, Luï Young, David Sánchez eta Jabier Bergara) jo du konposaketa borobiltzeko.

Bakoitzak bere etxetik grabatutako bideo zatiak batuta osatu dute YouTube kanalean eskegi duten behin betiko klipa. Bideoaren edizioaz Jabier Bergara arduratu da, eta audioaren edizioaz David Sanchez Damian.

Bizitzaren alde ilunei ere kolorea ateratzeko deia luztu nahi du Bergarak; indarrez beteriko mezu positiboa da hortaz: “Une txarretan ere gure onena ematen ikasi behar dugu. Bizitzarekin dantza egiten ikasi behar dugu. Eutsi danok eta aurrera!”