Bereizirik gaude, baina ez isolaturik. Horitxe zen Jurgi Ekiza musikariak helarazi nahi zuen mezu nagusia eta Ez Dakit Gehio Zer Eguna den kanta konposatu du horretarako. Gero, telefono bidezko grabaketa baten bitartez parte-hartzerako deia luzatu eta, azkenean, abesti kolektibo bat osatzea lortu du, 37 lagunen ahots eta ekarpen instrumentalari esker.

Koordinazioa, produkzioa eta nahastea benetako erronka izan dela dioen arren, emaitzarekin kontent da Ekiza. Musikalki ederra iruditzen zaio lortu dutena, hainbeste energia eta ukitu ezberdin metatzea abesti alai eta dinamiko batean.

Euskal Herriko bazter ezberdinetako ekarpenak ez ezik, Bouzouki greziarra, Bretainian bizi den japoniar baten soinuak eta Tahititik heldu diren piano eta gitarraK ere entzun daitezke Ez Dakit Gehio Zer Egun Den abestian.

“Elkarrengandik ikastea garrantzitsua da; baina, batez ere, gauzak elkarrekin egiten ikasi behar dugu, hori baita kultura!” esanez eskertu ditu Ekizak lan honetan bidelagun izan dituen guztiak.