Iosu Isaias Villanueva Castro eta Alayn Carazo Iturriaga kideek osatzen dute Hegazkin bikoa. Lehenago Eyharts, Txost! eta MKT taldeetan aritutakoak dira, besteak beste. 

Pop, synth-pop eta trip-hop estiloak jorratzen dihardute duela bi urtetik hona, eta oraintxu Haize Beltzak diskoa plazaratu dute, lehena. Sintetizadoreak, gitarra elektrikoak eta ahotsa erabiliz, musika sendo bezain sentikorra egiten dute.

Diskoa osatzen duten sei kantetako hitzak idazteaz Iosu arduratu da eta, azaldu duenez, maitasunaren ertz guztiak arakatuz aritu da abestiak osatzen. Lanaren izenburuak lokaleko ordu luzeei egiten omen die erreferentzia.

Arrasateko Shot! estudioan grabatu dute debuteko lana, Ander Barriusorekin. Diskoaren diseinua, berriz, Aritz Ormazabalek egin du. Mukuru kolektiboarekin atera dute diskoa, aurretik ere haren parte baitzen Villanueva. Hain justu, Mukuru kolektiboaren webgunean zein bandcamp atarian eskuratu daiteke diskoa.