Klikatu argazkien gainean handiago ikusteko

Euskal Herriko Musika Bulego Elkarteak seigarren sariketa ospatu du Barakaldoko BEC-en.  Hala, 2021ean bertako artista, talde eta musika proiektu nabarmenen lana aitortu du. Sektoreko zortzi profesionalek osatu due epaimahaia eta zortzi proposamen saritu ditu: Amak, Chill Mafia, Ether Ensemble, Ramon Lazkano, Gaur, Maite Larburu, Olatz Salvador eta Verde Prato. Etxepare Euskal Intitutuak, bestalde, Trio Zukan saritu du “euskal musika gure mugetatik kanpo zabaltzeko egin duen lanarengatik”. Bederatzi proiektu horietako bakoitzak 2.000 euro eta Fernando Mikelarenak egindako eskultura bana jaso du. 

Hamargarren garaikur bat ere izan da, Motxila 21 taldearentzat. Kasu honetan, Euskal Herriko Musika Bulego Elkarteko zuzendaritza-batzordeak eman du, ““bultzatzen duen elkartasuna eta musikarien arteko elkarlana eredugarria delako”. 

Epaimahaiak 100 proposamen baino gehiagoren artean aukeratu ditu irabazleak. Estilo askotako musika lanak iritsi direla azaldu dute: pop-rock-urban, musika klasiko garaikidea, folk, jazz edo musika elektronikoa, besteak beste. Euskara izan da proposamen gehienen hizkuntza nagusia (% 59), lan instrumentalek pisua irabazi duten arren (% 22). Gainerako lanak gaztelaniazkoak izan dira (% 11) eta hamar proiektutik ia bat beste hizkuntza batzuetan egin da.

Zuzeneko emanaldiek aberastu dute BEC-eko sari banaketa, ezinbestean. Chill Mafia, Gaur, Ether Ensemble, Maite Larburu, Verde Prato eta Amak aritu dira eszenatokian. Maria Ereña musikariak ETSren Zurekin Batera abestiaren leloa abestu du ekitaldiari hasiera emateko, Txalaparta Beat taldekoekin batera. Amaia Artetxe kazetariak aurkeztu du ekitaldia.