olatz salvador

Klikatu argazkien gainean handiago ikusteko

‘Basan’ izeneko aurrerapen-kanta zabaldu zuenean, disko berri bat kaleratzeko asmoa iragarri zuen Olatz Salvador musikari donostiarrak. Orain bigarren singlea sareratu du: ‘Gerorik balego’.

Sorkuntza-ziklo berri honetan soinu aldaketa bat egitera “ausartu” dela aitortu du Salvadorrek. Izan ere, oinarri elektronikoek eta distortsioek markatzen dituzte orain arte ezagutzera eman dituen bi ale berriak, bigarrenean lehenengoan baino “zikin, oldarkor eta basatiago".

Etsipenetik hasi du ‘Gerorik balego’: "Zerbaitetan sinestu nahi nuke, baina zakar da giroa", dio. Baina kantak aurrera egin ahala nabari zaio itxaropenari zirrikitua zabaltzeko borondatea. Izan ere, "dantza katartiko batera eraman nahi gaituen bidaia" modura definitu du Salvadorrek berak abestia.

‘Gerorik balego’ kanta 2022 urtean sortu zuen Loraldiaren testuinguruan, izen bereko egitasmorako. Datorren iraila amaieran Olatz Salvadorrek argitaratuko duen hirugarren diskoaren parte izango da, daukagun “mundu panorama ilun” honen aurrean “oihu egiteko gogoa” duela aitortu du.