Musika esperimentalaren esparruan erreferentziazko hitzordu bilakatzen ari da Kaiola. Galdakaoko festibalak edizio berria dakar 2021 honetan ere, ekainaren 26 eta 27 astebururako. Larunbat arratsaldean hiru kontzertu egingo dituzte, eta igandean beste hiru. Guztiak Torrezabalen izango dira.

Aurreko aldietan, musika esperimentalean nazioartean puntakoak diren artistak etorri izan dira Kaiolara. Aurten, aldiz, etxera begira jarri da eta bertako musika aurrerakoiak bultzatzea hartu du lehentasuntzat.Hala, euskal artistei dagokionez, Anarik, Moxalek, Ainara Legardonek eta Aitor Etxebarriak joko dute.

Bertako musikariez gain, Asturiasko Elle Belga (Josele Garcia eta Fanny Alvarez) eta Galgo (Javier Bejarano eta Veronica Galan) bikoteak ariko dira.

Emanaldiak hasi baino ordu erdi lehenago zabalduko dira ateak. Egun bakoitzerako sarrera 15 eurokoa izango da, eta bi egunetarako bonoa 25 eurokoa.