Hamalau urte daramatza Fly Shit taldeak ideiak eta doinuak zabaltzen. Zuk zeuk egin filosofiari fidel, hiru disko argitaratu dituzte orain arte.

Azkenekoa, Arnas bakoitzeko ernetzen, 80etako hardcorean ditu zimenduak. Hala ere, energia soberan badago ere, ez da disko honetan abiadura gailentzen dena, hau da, zapatilla deritzogun hori. Hemen, joskera oso landua aurkituko dugu, puntada desberdinekoa, eta bozgorailuak ozen jarriz gero, entzulea mugimendu espasmodikoetan hasteko arrisku handia dago.

Laburbilduz, Bap!!, Bad Brains, SNFU edota Dead Kennedys taldeen zaleek bai edo bai atseginez hartu beharko luketen diskoa da hau.