Euskal tradizioko kantuak biltzeko eta elkarrekin zabaltzeko xedea duen proiektu batean lanean ari dira Euskadiko Orkestrako eta Kalakan-eko musikariak. Jagoba Astiazaran musikari eta konpositoreak hamabi kantu orkestrarako moldatu ditu, eta horiek disko batean bilduko dituzte. Maiatza eta ekaina bitartean grabatuko dute lana, eta udazkenean plazaratuko dute, Elkar etxearen zigilupean. Argitaratzeaz bat, diskoa aurkezteko kontzertu bira bat ere egingo dute elkarrekin, eta, data zehatzak oraindik jakinarazi ez badituzte ere, aurreratu dute emanaldiak urrian eta azaroan izango direla, Iruñean, Gasteizen, Bilbon, Donibane Lohizunen eta Donostian. Juanjo Oconen zuzendaritzapean ariko dira musikariak emanaldietan.

Iaz zen plazara ateratzekoa egitasmoa, baina, «ageriko arrazoiak tarteko», atzeratzea erabaki zuten. Orkestrak duela bi hamarkada abiatutako KlasikAT egitasmoaren jarraipena da proiektu berria.