Cécile McLorin Salvant

Klikatu argazkien gainean handiago ikusteko

Donostiako 55. Heineken Jazzaldiak, datak ez ezik, egitarauaren muina izango den artista-zerrenda mamitsua ere itxi du dagoeneko, eta sarrerak aurki www.heinekenjazzaldia.eus eta www.donostiakultura.eus webguneetan eskuragarri izango direla jakinarazi dute.

Jaialdia datorren uztailaren 22an hasi eta bost egunez luzatuko da hilaren 26ra arte, Gipuzkoako hiriburuan. Bertako musikariak babesteaz gain, ohiko legez, kanpotik etorritako artista sonatuek ere jantziko dute 2020ko kartela. Hain justu zerrenda hori iragarri berri du antolakuntzak.

Tartean dira hainbat piano-jotzaile handi: Abdullah Ibrahim, Danilo Pérez, Hiromi, Kenny Barron, Danilo Rea, Rita Marcotulli eta Dado Moroni.

Baita trompeta-jotzaile ezagunak ere: Joe Magnarelli, Enrico Rava, Fabrizio Bosso eta Paolo Fresu.

Ahotsei dagokionez: Cécile McLorin Salvant, Kurt Elling eta Sharon Clark apartak.

Eta gainera: Makaya McRaven bateria-jotzailea eta konpositore gaztea; Dave Holland baxu-jotzailea; Fire! Orchestra talde eskandinaviar handia eta Ezra Collective britainiarrak. Eta berriz ere John Zorn saxofoi‑jotzailea, Jazzaldirako esklusiboa izango den proiektu oso berezi batekin: proposamen bikoitz bat, zeinetan Masada Quartet mitikoari bere New Masada Quartet batuko baitzaio. John Zorn bi orduz saxofoia jotzen!!

Bestalde, Taj Mahal bluesaren legenda lehenengo aldiz izango da Donostian, New Orleanseko musikari ospetsu Jon Clearyrekin batera.

Proposamen heterogeneoagoak ere badakartza eskaintzak, hala nola, Simple Minds eskoziarrak, Graham Nash ahaztezina, Vintage Trouble eta North Mississippi Allstars estatubatuarrak, Sly & Robbie jamaikarrak, eta 2019ko indieko errebelazioa den León Benavente.