Break On Stage jaialdiak XI. edizioa beteko du aurten. Urtero bezala, Bilbao Arena eremuan egingo dute eta punta-puntako artistek parte hartuko dute kultura urbanoaren erakusleiho erraldoi honetan.

Lau agertoki ezberdinek hartuko dituzte egitarauan jasotako ikuskizun guztiak: Urban Stage, BMX Big Jump, Scooter Freestyle eta Freestyle Dance eremua.

Musika urbanoak guztietan izango du presentzia, jaialdi osoa girotzeaz arduratuko baita. Baina, batez ere, hiru abagunetan izango da garrantzitsua: Break Dance Eszeniko lehiaketan, eta honetan nagusituko diren bi talde onenek egingo duten buruz buruko Bataila Finalean: 10 minututan, dantzariek euren doai guztiak erakutsiko dituzte epaimahai baten aurrean eta DJak proposatutako erritmoan.

Bestalde, Show Urbanoak, iraupen laburreko ikuskizun harrigarri eta garaikideak ere musikak lagunduta izango dira.

Info+, egitarau osoa eta sarrerak salgai breakonstage.com webgunean