90eko hamarkadan Madrilbo Vallecas auzoan sortu zen Boikot bandak punk rocka kasik bere aldaera guztietan jorratu du. Espainiako hiriburuko Street-punk zirkuituan mugitzen hasi eta Latinamerika, Europa, Asia eta Ipar Amerika aldera egin zuten laister.

Kosta (ahotsa eta gitarra), Alberto (ahotsa eta gitarra), Grass (bateria) eta Juankar (ahotsa eta baxua) dira proiektuaren bizkarrezurra, nahiz eta azken urteotan bestelako ekarpenak (haizeak, biolinak, rapeoak, teklatuak, perkusioak…) egin dituzten artistak ere batu diren aldiro-aldiro.

‘Never ending tour’ moduan aritu dira urte luzez, eta orain atsedena hartzeko garaia heldu zaiela uste dute. Baina lehenago, 13 kontzertu programatu dituzte 2020 osoan zehar euren zaleei “gero arte” esateko, geldialdi zehaztugabea egingo baitute 2021etik aurrera.

Euskal Herrira martxoa erdialdera iritsiko dira, hilaren 19tik 21era bitarte izango den Iruña Rock jaialdira hain justu.