Preachin diskoan hamar kantu bildu dituzte, horietatik lau konposizio propioak eta gainontzekoak Carl Perkins edota Robert Johnsonen bertsioak (besteak beste). Bluesa, swing-a, R&Ba, rock and rolla... dira sotana gabeko apaiz pekatari hauentzako eskritura santuak.

*** Historia pixka bat ***
Reverendos 1997. urtean osatu zen Igor Garciaren (ahotsa eta pianoa) eta Alvaro Martinezen (gitarra) eskutik bluesaren hots zaharrak berreskuratzeko eta eurak erakartzen zituen estiloak utzitako hutsunea betetzeko, 40. eta 50. urteetako beltzen musikak, Kaliforniako mendebaldeko kostaldeko bluesaren hotsak, rockabillyak eta swingak eraginda, baita T-Bone Walker eta Freddie King musikariek eraginda ere.
The Hollers taldetik etorria zen Igor, eta Bullyson Blues Band taldetik Alvaro. The Blue Spirits izan zen taldearen lehenengo izena, baina gero Reverendos izena egin zuen bere. Sekzio erritmikoan aldaketa ugari egin ostean, taldeak bila zuen oreka aurkitu zuen Victor Martinekin (Temblores) kontrabaxuan eta Javi Caballerorekin (Jukebox Rackett) baterian.