Bederatzikoa

Beethoven eta bertsolaritza harilkatu dituzte Egañak eta Lizasok

Bertsolaritzaren historian badira zeresana eman duten eta betirako bertsolaritzaren gordailuan geratu diren bederatzi puntuko hainbat saio. Hala nola, Amurizak 80ko txapelketan ‘Euska Herriari’ gaiari helduta kantatutakoa. Edota Jon Lopategik  agure zahar baten arropari botatakoa. Era berean, bederatzigarrena da Beethovenen sinfoniarik goraipatuena. 

Hala, ‘Bederatzikoa’ izeneko emankizuna ondu dute Andoni Egaña bertsolariak eta Xabier Lizaso pianojoleak. Beethovenek konposatutako musika klasikoa eta bertsolaritza uztartzen duen saioa da. Beethoven euskaraz ulertu, kantatu eta esplikatzen duen proiektua da. Izan ere, musika emankizuna ez ezik, konposatzailearen bizitzaren inguruko hainbat pasarteren kontakizuna ere badakar. Esate beterako, ‘Elisarentzat’ ezagun hura ‘Teresarentzat’ idatzi zuela; konposatzailearen letra txarrak eragin zuela nahasmendua, hura hil ostean topatu baitzuten partitura, eta XX.mendean deskubritu zuten akatsa. 

Egaña, Lizaso eta 400 kilogramoko pianoa herririk herri dabiltza ‘Bederatzikoa’ emanaldia zabaltzen.