2018 urtean sortu zen Addar banda Bermeon. Gorka Padronesek (Zona Cero, Sinnerdolls, Tutiliklas) euskarazko rock&roll talde berri bat eratu nahi zuen, eta hainbat lagun batu zaizkio proiektu honetan bidaide: Imanol Rodriguez (Zona Cero, Radio Guerrilla, Galarren), Beñat Aurre (Zartada), eta Xabier Bilbao (Zona Cero, Radio Guerrilla); azken honek taldea utzi behar izan du eta Mikel Omagok ordezkatu du.
Urtebetez konposatzen ibili eta gero, Sugarra diskoa osatzen duten bost kantak 2019ko azaroan iritsi ziren Bilboko Koba estudiora, eta Xanperen (Pi.L.T., Rat-zinger) eskutik egin zuten grabaketa. Orain, plataforma digital ezberdinetan jarri dituzte eskuragarri.
Rock eskandinabiarrak kutsatutako melodiek osatzen dute lana; energia eta riff potenteak. Hitzei dagokienez, zekenkeria, egozentrismoa, pasioa, beldurra nahiz itxaropena hartu dituzte hizpide.