Rozalen

Klikatu argazkien gainean handiago ikusteko

Fair Saturday fundazioak datorren urriaren 28rako iragarri du Ura Bere Bidean musika ekitaldiaren hirugarren edizioa. 2020an sortu zen proiektuak belaunaldi eta estilo ezberdinetako euskal musikariak batzen ditu, bertsio sinfonikoan. 

Aurreko urteetan bezala, oraingo honetan ere Fernando Velázquez arduratuko da 20 bat piezaren egokitzapen sinfonikoa konposatzeaz, eta talde egileek Bilboko Orkestra Sinfonikoarekin eta Biloko Koralarekin batera grabatuko dituzte. Zuzeneko saioa, Iñaki Irastorzak diseinatutako ikus-entzunezko espektakulu osoa, Barakaldoko BEC-en izango da eta sarrerak salgai daude jada 12 eta 75 euro artean. 

2023ko Ura Bere Bidean programan Parabellum, Zea Mays, Ane Etchegoyen, ETS, Bulego, Esne Beltza, Gatibu, Sorotan Bele, Gozategi, Delirium Tremens, Urtz, Mikel Urdangarin, Idoia, Doctor Deseo eta Neomak ageri dira, besteak beste. Eta, berritasun modura, Euskal Herritik kanpoko artista baten parte hartzea ere iragarri dute: Rozalén espainiarra. Zentzu horretan, antolatzaileek aurreratu dute nazioarteko artista gehiago ekartzeko lanean ari direla. 

Urriaren 28an BECen 11.500 bat ikus-entzule batzea espero dute. Gainera, Gasteizen ere, irailean, aurrerapen kontzertu bat egingo dutela azaldu dute.