Nork ostu dit apirila?

Covid19 birusari loturiko osasun krisialdiaren eta itxialdiaren ondoriozko hainbat egoera berri musikatu eta kantatu nahi dituzte Iker Laurobak eta Jon Martinek. Besteak beste, osasun-langileen borroka, etxean denbora konpartitzera ohitu gabeko bikoteak, teoria konspiranoikoak… guztiek lekua dute Berria Aretoan apurka-apurka aurkezten ari diren piezen artean.

Estilo aldetik, rapa, popa, musika herrikoia eta beste hainbat genero jorratzen ari dira, eta Ane Narbarte nahiz Eñaut Aiartzaguenaren ilustrazioekin osatzen ari dira bideoak.

Pieza gehien-gehienak originalak dira, baina badira bi salbuespen. Batetik, zendu berri den Luis Eduardo Autek Txiki eta Otaegiren fusilamenduaren bezperan idatzitako Al Alba sonatua euskaratu dute. Eta, bestetik, itxialdi-proiektu honi izena eman dion Nork ostu dit apirila? kanta Joaquín Sabinaren jatorrizko ¿Quién me ha robado el mes de abril? abestitik abiatuta osatu dute.