DVD-ak

Egun jasaten ari garen inbasioari esker DEVOren bi DVD daude eskuragarri: The Complete Truth about De-evolution & DEVO Live eta Live in the Land of the Rising Sun. Lehenengoa bikoitza da eta bertan taldeak grabatu zituen klip iraultzaile guztiak biltzen dira. Freedom of Choice, Satisfaction eta Whip it Up kantu ezagunen klipak ikus daitezke eta baita jatorrian laser-disc formatuan argitaratu zuten beren lehendabiziko film laburra eta klip bitxiak ere, tartean Disco Dancer itzela eta Post-Post Moder Man. Estra ugari dakar, 1970eko hamarkadako zuzeneko mongolo-irudiak esaterako. Bigarren diskoan 1996. urtean Lollapalooza musika jaialdiaren barruan eskaini zuten kontzertua biltzen da. Zuzenekoa egunez grabatuta dago, eta ikaragarri ona da. Ez dituzte zuzenean erabiltzen zituzten ohiko bideo irudien laguntzarik. Kontzertu osoa baxu, gitarra, bateria, ahotsa eta teklatuetan oinarritzen da. Hortaz, punk rock kontzertua dirudi; Metallicak jotzeko zain dauden ikusleen aurpegi txundituak ikustea baino ez dago. Gainera, lehenengo hiru diskoetako kantuak jotzen dituzte, bi izan ezik, Whip it Up eta Girl You Want. Erosi eta lau aldiz segituan ikusi nuen DVD bikoitza. E-z-i-n-b-e-s-t-e-k-o-a.
Live in the Land of Rising Sun-ek berriz, 2003. urtean Japonian grabaturiko kontzertua biltzen du; ekialdeko manga nerabeen aurrean jo zuten zuzeneko grinatsua, hain zuzen. Klasiko guztiak entzun eta ikus daitezke. Estra anitz dakar honek ere: komentarioak, devotarrak erosketak egiten Tokyon, umore asko eta klip bitxia. Azken hau ere oso interesgarria.