Irundik dator Zizateh taldea. Eskarmentu handiko musikariez osatua da, nahiz eta aurretik ez genuen talde honi buruzko inongo erreferentziarik. Zizateh-k rock estiloa jorratzen du, beti ere modu oso askean eta etorri esperimentatzaile argi batekin. Garapen luzeko kantuak dira oro har (Indarkeri ezkutatua abestiak esaterako, zazpi minutu irauten ditu) eta erabilitako hizkuntzak euskara eta gaztelania dira. Zainax (gitarra eta ahotsa), Gaizkitron (baxua eta koroak) eta Patxuko (bateria) musikariek osatzen dute Zizateh. Iruzkin hau idazterako orduan, aurki estudioan berriz sartzekoak direla iragarri digute eta irailean edo urrian disko berria argitara emanen dutela, segur aski autogestioaren bidez.