Desertuko biztanleei buruz errezitaldia
 
"Arriagako Gelatxoak" egitarauaren baitan ikusi ahal izan genuen Bernardo Atxaga idazlearen eta Anari abeslariaren ahotsak biltzen dituen Desertuko biztanleei buruz errezitaldia. Formato txikiko ikuskizunak antolatzen dituen programa hau ez ohiko espazioetan egiten da eta, oraingoan, Arriagako foyer-a izan zen eszena eta butaka patio inprobisatua. Joxe Angel Arbelaitzen ekoizpena dugu errezitaldia, Argia astekariak laguntzen duena.


Desertua, area, hondarra eta inguru lehor eta okre honetan bizi diren pertsonaiak izan zituen hizpide idazleak, beti ere, Anariren gitarrak lagunduta. Hain zuzen ere, errezitaldia zabaltzeko, Zebra (Metak 2005) diskoko Desertua abestia irakurri zuen ozen Atxagak, abestia poema hunkigarria bihurtuz: "Area naiz/are pilo honetan/ arez beterik ditut/ ametsak eta bihotza". Zebra diskoaren abestiak berriz ere entzutea eskertu genuen, biluzik, Anari bakarrik, gitarra lagun, disko bikain horren garaikidetasuna agerian utziz.

Adi jarraitu genuen Atxagaren ahotsa, letania bat bezala. Asun Garikanoren Farwesteko Euskal Herria, Atxagak berak idatzitako Nevadako Egunak eta beste testu batzuk irakurri zituen idazleak. Horrela, desertuko istorio desberdinak ezagutu genituen: oilarraren dei salbatzailea, basa zaldiak eta mustang-ak gertutik ezagutu izanaren gainekoa edota desertuko jatorrizko biztale diren indiarren kondairak eta jasandako sarraski odoltsuei buruzkoak.

Desertua, artista bien sorkuntza lanetan askotan ageri den figura izanda, aise aritu ziren biak gaiaren inguruan. "Desertu erdian/ bale eskeleto bat da/ behin itsasoa han izan zeneko/ aztarna bakarra", Anariren Habiak  diskoko Aztarnak abestia bukatzeko. Hitza abestua ala errezitatua izan, eduki dezakeen indarra eta boterearen isla.