Munster Records zigiluak DVDak argitaratzeari ekin dio. Hala, dagoeneko Beasts of Bourbon australiar koadrilaren eta Detroiteko Demolition Doll Rods hirukotearen filmaketak karrikaratu ditu (azken DVD horri datorren zenbakian helduko diogu). Low Life in Spain Antipodetako boskoteak iaz Madrileko Copernico aretoan eskaini zuen kontzertua jasotzen du. 23 urtetan grabaturiko bost diskoetako 15 kantu jasotzen ditu. Zuzeneko izerditsua eta gordina da, bandak berak erakusten duen jarreraren parekoa, harroa, alegia. Rock gitarra hots zingiratsuak, Tex Perkins kantariaren ahots ilun eta boteretsuarekin nola borrokatzen diren ikusteko aukera paregabea eskaintzen du filmazioak. Guztira rock australiar odoltsuarekin zipriztinduriko 90 minutu. Opari gisa, diskografia osoa, argazkiak eta klipak.