Entzun! aldizkariaren ale honetan musika jamaikarrean Jamaikatik kanpoko musikek izan duten eragina (AEBetako R&B eta soula bereziki) zein izan den eta musika jamaikarrak, ondoren, beste musiken gainean izan duen eraginaz hitz egiten da. Erreportaje horren zati garrantzitsua dub musikari eskainitakoa da eta egia esan, hitzez azaltzen zaila den kontzeptua dela onartu beharra dago. Orain aurkezten dizuegun diskoa entzutea izan daiteke erreportajean agertzen den azalpena hobe ulertzeko tresna egokia. King Tubby izan zen dub kontzeptuaren sortzailea eta erreportajean azaltzen den moduan, bere ikasle aurreratuenen artean Prince Jammy ezizena zuena zegoen. Orain aurkezten dizuegun disko honetan Prince Jammy soinu teknikariak Dennis Brownek konposatutako edota ekoiztutako musikak nola birnahasten dituen entzun ahal izango dugu; hau da, Prince Jammy-k reggaean egon den abeslari, konposatzaile eta ekoizle handienetakoaren kantuei egiten dien dub bertsioak entzun ahal izango ditugu. Dennis Brown, Junior Delgado edo Tamlins bezalako abeslarien kantu hauek, 1978 eta 1979an kaleratu ziren Umoja love & Unity eta 20th Century Debwise izeneko bi disko desberdinetan. Garai hartan dub musika bere maila gorenenean zegoen eta merkatua dub bertsioekin osatutako diskoez gainezka zegoen, hori dela eta agian ez zitzaien merezi zuten arreta eskaini eta orain, Blood & Fire zigiluaren lan izugarriari esker, garai hartan egindako akats barkaezina konpondu dezakegu. Garaiz gaude.