Maynard James Keenan-en (Tool) proiektu paraleloa da A Perfect Circle taldea. Lehenengo diskoak bezala, bigarren lan honek ere iluntasunetik urrutiratzeko eta argirantz gerturatzeko saiakera bat dirudi, helburu hori lortuaz.Thirteenth Step entzuterakoan eta euren lehenengo diskoarekin alderatuz, argia, xamurra eta leunagoa nabaritzen da. Hala ere, izan baditu leuntasun hori hausten duten distirak, baina gero berriro xamurtasunean barneratzen da diskoa, entzulea trantze batean murgildurik. Minimalistagoa den disko honetako poro guztiei erromantizismoa darie sekulako erakargarritasuna sortuaz. Esan genezake, beste hitzak erabiliz, behin bista gainean eduki eta gero beste nonbaitera begiratzea galerazten digun argia bezalakoa dela. Hamabi distira hauen dinamoa ondoko musikari hauek osatzen dute: Maynard, Billy, Josh, Jeordie, Troy, Paz (Zwan), Danny (Tool)